- Otte Rignante, mute e 'mpiripicchio,
- mill'anne 'e storia, nu miscuglio 'e razze;
- otte Rignante, ognuno 'int' a 'na nicchia
- scavata dint' 'pprete 'e nu palazzo.
-
- Ognuno 'lloro ha fatto 'a parta soja,
- accummincianno 'a mana a Re Ruggiero;
- quaccuno nce ha menato 'mpasto a' 'e vuoje,
- quacc'ate sarrà stato cchiù ssincero.
-
- Ma 'llacreme 'e 'stu populo traduto
- da cientemila chiacchiere e pprumesse,
- fanno nu mare preputente e ffuto
- addò s'affoca 'o chianto 'e tutt' 'e fesse.
-
- Fesse, pecché 'stu populo è dde còre,
- e ccrere a ttutto chello ca se dice;
- fesse, pecché nce spera e ccrere ancora
- ca nasce 'na balena 'a int' a n'alice.
-
- Otte Rignante, ott'uommene putiente,
- patrune 'e ciente ville e cciente règge;
- nce hanno abbuffato sulamente 'e stiente...
- Stamme 'o duimila e stamme ancora pegge.
-
- E ddint' 'o mmarmo 'e 'sti suggette antiche
- nce sta tantu lamiento e ppoca gloria;
- io quann' 'e gguardo, me suffermo e ddico...
- Ma c'hanno fatto 'int' a mmill'anne 'e
storia!"
|
